தூர நிமிடங்கள்

மழைத்துளியை எண்ணிப் பார்க்க நினைத்து
தோற்று போன நிமிடங்கள்

அப்பாவுக்கு தெரியாமல் அன்றைய செய்தித்தாளை
கிழித்து கப்பல் விட்டு கைதட்டிய நிமிடங்கள்

மண்வாசம் வந்தவுடன் வீட்டின் வெளியே ஓடி சென்று
மழைத்துளியில் நனைய ஆயத்தமான தருணங்கள்

புத்தகங்கள் நனையுமே என்ற கவலை இன்றி
மழையில் நனைந்து கொண்டே தோழியுடன் வீடு சென்ற நாட்கள்

மழையின் காரணமாக விளையாட்டு பாடவேளை
கணித பாடவேளை மாறியதால் மழையை திட்டிய நிமிடங்கள்

"மழையின் காரணமாக இன்று பள்ளி விடுமுறை"- என்ற அறிவிப்பு
பலகையைப் பார்த்தவுடன் இரட்டிப்பு வேகத்தில் வீட்டிற்கு ஓடிய தருணங்கள்

இவை எல்லாம் வெகு உயரத்தில் சென்று விட்டன
ஒரு மாலை பொழுதில் என் உயரமான அலுவலகத்தின் கண்ணாடி ஜன்னல்
வழியாக மழையை வெறித்த நிமிடத்தில்.